ಡಾ. ಸುಮತಿ ಪಿ ಅವರ *ಚುಕ್ಕಿ ಚಂದ್ರಮ* ಶಿಶು ಗೀತೆಗಳ ಕವನ ಸಂಕಲನ

ಚುಕ್ಕಿ ಚಂದ್ರಮ, ಲಗೋರಿ ಆಟ, ಬೆಣ್ಣೆ ಮುದ್ದೆ ಕಳ್ಳ ಕೃಷ್ಣ ,ಆಡು ನಲಿದಾಡು, ಹಸಿರು ಪರಿಸರ, ಮಗು ಮತ್ತು ಅಳಿಲು, ಕುಣಿಯೋಣು ಬಾ, ಬೆಳಗಾಯಿತು ಏಳು ಕಂದ, ಬಣ್ಣದ ದೋಣಿ ,ಪರಿಸರ ಸಂರಕ್ಷಣೆ, ಹುಣ್ಣಿಮೆ ರಾತ್ರಿ ಸೇರಿದಂತೆ 30 ಗೀತೆಗಳು ಇಲ್ಲಿವೆ. ವೈವಿಧ್ಯಮಯವಾದ ಗೀತೆಗಳು ಹಾಡುಗಬ್ಬಗಳು ,ಅಭಿನಯ ಗೀತೆಗಳು, ಎಲ್ಲವೂ ಸೇರಿದ ಸುಂದರ ಸೊಬಗಿನ ಶಿಶುಗೀತೆಗಳು ಅಭಿನಯ ಮಾಡಿ ನಲಿಯಬಹುದು. ಏಕೆ ?ಏನು? ಹೇಗೆ ? ಎಂಬ ಪ್ರಶ್ನೆಗಳನ್ನು ಹಾಕಿ, ತಾರ್ಕಿಕವಾಗಿ ಯೋಚಿಸಿಕೊಂಡು,ಯಾವುದು ಸರಿ, ಯಾವುದು ತಪ್ಪು ಎಂದು ಗ್ರಹಿಸಿ ಅರ್ಥ ಮಾಡಿಕೊಳ್ಳುವುದರ ಮೂಲಕ ಜ್ಞಾನ ಕಟ್ಟುವ ಕೆಲಸಕ್ಕೆ ಇಲ್ಲಿನ ಪದ್ಯಗಳು ಸಹಕಾರಿಯಾಗಿವೆ. ಮೂರು ನಾಲ್ಕು ಮಾತ್ರೆಗಳ ಓಟ ಗಮನಿಸಿದೆ .ಇದು ಸುಲಲಿತವಾಗಿ ಎಲ್ಲರಿಗೂ ಓದಲಿಕ್ಕೆ ಅನುಕೂಲ,ಅಲ್ಲದೆ ತಮ್ಮದೇ ಆದ ರಾಗ ಸಂಯೋಜನೆ ಮಾಡಿ ಹಾಡಲು ಸಹಕಾರಿ. ಮಕ್ಕಳ ಮನೋಮಟ್ಟವನ್ನು ಅರಿತಿರುವ ಡಾ. ಸುಮತಿ ಪಿ . ಅವರು ಅತ್ಯುತ್ತಮವಾದ ಶಿಶು ಗೀತೆಗಳ ಸಂಕಲನವನ್ನು ಸಾಹಿತ್ಯ ಲೋಕಕ್ಕೆ ನೀಡಿ ಮಹದುಪಕಾರ ಮಾಡಿದ್ದಾರೆ. ಶಿಕ್ಷಕರ,ಪೋಷಕರ, ವಿದ್ಯಾರ್ಥಿಗಳ ಸ್ನೇಹದ ಈ ಸಂಕಲನ ಜನ ಮೆಚ್ಚುಗೆ ಗಳಿಸುವುದರಲ್ಲಿ ಯಾವ ಸಂಶಯವೂ ಇಲ್ಲ. ಈ ಕೃತಿಗೆ ಪ್ರಶಸ್ತಿ ಆದರಗಳು ಬರಲಿ. ಪುಟಾಣಿ ದೇವರುಗಳ ಮನೆ, ಮನ ತಲುಪಲಿ.ಕವಯತ್ರಿಯವರ ಸಂಕಲ್ಪ ಈಡೇರಲಿ. ಸದಾ ಕಾಲವು ಶುಭವಾಗಲಿ.ಇದೊಂದು ಅತ್ಯುತ್ತಮ ಕೃತಿಯಾಗಿದ್ದು, ಎಲ್ಲಾ ಶಾಲೆಗಳಲ್ಲೂ ಬಳಸುವಂತಾಗಲಿ ಇದು ನನ್ನ ಹರಕೆ, ಹಾರೈಕೆಯಾಗಿದೆ,

ಅಮ್ಮ ಅಮ್ಮ ಬಂದ ನೋಡು ಚುಕ್ಕಿ ಚಂದ್ರಮ/

ಪೂರ್ಣ ಚಂದ್ರನ ನೋಡಲಿಂದು ಬಹಳ ಸಂಭ್ರಮ//

ತಾರೆಗಳ ಮಧ್ಯದಲಿ ಹೊಳೆಯುತ್ತಿರುವನು/

ಆಟ ಆಡಲು ಕರೆದರವನು ದೂರ ಸರಿಯುವನು/

ಏಣಿ ಇಟ್ಟು ಗಗನ ಏರಿ ನೀನು ಹೋಗುವೆಯಾ?/

 ಅಮ್ಮ ನೀ ಚಂದಮಾಮನ  ತಂದು ಕೊಡುವೆಯಾ/

ಚೆಂದಮಾಮನ ಕೊಟ್ಟರೆ ನಿನಗೆ  ಮುದ್ದು ಮಾಡುವೆ/

ನೀನು ಕೊಟ್ಟ ತುತ್ತು ತಿಂದು ನಿದ್ದೆ  ಹೋಗುವೆ/

ಅಕ್ಕ,ಅಣ್ಣ ಎಲ್ಲರೂ ಬನ್ನಿ  ಹೊರಗೆ ಹೋಗುವ/

ಅಂಗಳದಿ ಚಂದಮಾಮನ ನಾವು ನೋಡುವ/

ಹುಣ್ಣಿಮೆಯ ರಾತ್ರಿಯದು ಎಷ್ಟು ಚೆಂದವೋ/

ದುಂಡಗಾದ ಚಂದಮಾಮ ಕಾಣುವಂದವೋ/

ನಮ್ಮ ನೋಡಿ ನಕ್ಕು ಬಿಡುವ   ಚಂದಮಾಮನು/

ಮೆಲ್ಲನೆ ಕಾಣದಂತೆ ಮಾಯವಾಗುವನು/

ಮೋಡಗಳ ಮರೆಯಲ್ಲಿ  ಅಡಗಿ ಕೂರುವನು/

ಕಾಣಲಿಲ್ಲವೆಂದು ಸುಮ್ಮನಿರೆ  ಮತ್ತೆ ಬರುವನು/

ಕಣ್ಣುಮುಚ್ಚಾಲೆಯಾಟವನು ಅವನು ಆಡುವನು/

ನಮ್ಮನ್ನೆಲ್ಲ ಆಡಿಸುವ ಅವನು ಜಾಣನು/

ಚೆಂದಮಾಮ ಬಾರೋ ಎಂದು  ನಾವು ಕರೆಯೋಣ/

ಅವನ ಕೂಡಿ ಆಟವನು ಆಡಿ ಸಂತಸ ಪಡೋಣ./