ನಾಟಕ ಭಾರ್ಗವ ಕೆಂಪರಾಜು ಅವರ ಕಾಮಧೇನು

ಇಂದಿನ ಜೀವನ ಕ್ರಮದಲ್ಲಿ ಪ್ರವಾಸ ಹೋಗುವುದು ಒಂದು ಮುಖ್ಯ ಅಂಶವಾಗಿ ಬೆಳೆದು ಬಂದಿರುತ್ತದೆ. ಕೆಲವರಿಗೆ ಇದು ಲೋಕಾನುಭವಕ್ಕೆ ಕಾರಣವಾದರೆ ಇನ್ನು ಕೆಲವರಿಗೆ ಜಾರಿತ್ರಿಕ, ಧಾರ್ಮಿಕ, ಸಾಮಾಜಿಕ ಆಸಕ್ತಿ ಮುಖ್ಯವಾಗಿರುತ್ತದೆ. ಇಂತಹ ಪ್ರವಾಸ ಹೋಗುವುದರಿಂದ ಹೆಚ್ಚಿನ ಪ್ರಯೋಜನವಾಗಬೇಕಾದರೆ ಈಗಾಗಲೇ ಅಲ್ಲಿಗೆ ಭೇಟಿ ಮಾಡಿರುವವರ ಅನುಭವ ತುಂಬಾ ಉಪಯುಕ್ತ. ಇಂತಹ ಕಥನ ಸಾಹಿತ್ಯವನ್ನು ಓದುವುದರಿಂದ ಆಯಾ ತಾಣದಲ್ಲಿ ಎದುರಾಗಬಹುದಾದ ಸಮಸ್ಯೆಗಳನ್ನು ತಿಳಿದು ಬೇಕಾದ ಮುನ್ನಚ್ಚರಿಗೆ ತೆಗೆದುಕೊಂಡು ನಮ್ಮ ಪ್ರವಾಸ ನೆನಪು ಉಳಿಯುವಂತೆ ಮಾಡಬಹುದು. ದಕ್ಷಿಣ ಕನ್ನಡ ಜಿಲ್ಲೆ ಕರ್ನಾಟಕದ ಪಶ್ಚಿಮ ತೀರದ ಸುಂದರ ಪ್ರದೇಶ. ಬೇರೆ ಬೇರೆ ಋತುಗಳಲ್ಲಿ ವಿಶಿಷ್ಟವಾದ ಅನುಭವಗಳನ್ನು ಕೊಡುತ್ತದೆ. ನಿಸರ್ಗದ ಸೌಂದರ್ಯ ನಿರೀಕ್ಷಿಸಿ ಬರುವ ಪ್ರವಾಸಿಗಳಿಗೆ ಇಲ್ಲಿನ ಪ್ರಕೃತಿ ಸೌಂದರ್ಯ ಆಪ್ತವಾಗುತ್ತವೆ. ವಿವಿಧ ಧರ್ಮಗಳ ಶ್ರದ್ಧಾ ಕೇಂದ್ರಗಳು ಅಲ್ಲಲ್ಲಿ ಎದುರಾಗಿ ಮನಸ್ಸಿಗೆ ಧನ್ಯತಾ ಭಾವ ಮೂಡುತ್ತದೆ. ಕಾಮಧೇನು ಶ್ರೀ ಕ್ಷೇತ್ರಗಳ ಸಂದರ್ಶನ ಎಂಬ ಶೀರ್ಷಿಕೆಯ ಪ್ರವಾಸ ಕಥನ ಈ ಪ್ರದೇಶವನ್ನು ಸಂದರ್ಶಿಸುವವರಿಗೆ ಅತ್ಯಂತ ಉಪಯುಕ್ತ ಕೈಪಿಡಿಯಾಗಿದೆ. ಪ್ರವಾಸ ಆಸಕ್ತರಾದ ನಿವೃತ್ತ ಪ್ರಾಂಶುಪಾಲ ಶ್ರೀ ಕೆಂಪರಾಜು ತಮ್ಮ ಅನುಭವಗಳನ್ನು ವಿಸ್ತೃತವಾಗಿ ಈ ಕೃತಿಯಲ್ಲಿ ಬರೆದಿದ್ದಾರೆ. ವ್ಯಾಪಕ ಪ್ರವಾಸ ಮಾಡಿರುವ ಅವರು ಪ್ರವಾಸ ಪ್ರಿಯ. ತೀರ್ಥಸ್ಥಳಗಳಿಗೆ ಹೋಗುವವರಿಗೆ ಉಪಯುಕ್ತ ಮಾಹಿತಿಯನ್ನು ಅವರು ಈ ಕೃತಿಯಲ್ಲಿ ಮೂಡಿಸಿದ್ದಾರೆ. ಇದರಲ್ಲಿ ಪುಣ್ಯ ಸ್ಥಳಗಳಾದ ಶ್ರೀ ಕ್ಷೇತ್ರ ಧರ್ಮಸ್ಥಳ, ಶ್ರೀ ಕ್ಷೇತ್ರ ಪೊಳಲಿ ರಾಜರಾಜೇಶ್ವರಿ ದೇವಸ್ಥಾನ, ಕುಕ್ಕೆ ಸುಬ್ರಹ್ಮಣ್ಯ, ಕೊಲ್ಲೂರು ಮೂಕಾಂಬಿಕಾ ಕ್ಷೇತ್ರ, ತಲಕಾಡು, ಸಿಂಗನಲ್ಲೂರು ಕರಿಬಸವೇಶ್ವರ, ಮಾದೇಶ್ವರ ಬೆಟ್ಟ ಮುಂತಾದ ಸ್ಥಳಗಳ ಪರಿಚಯಾತ್ಮಕ ಲೇಖನಗಳಿವೆ. ಈ ಕೃತಿಯ ವಿಶೇಷವೆಂದರೆ ಆಯ್ದುಕೊಂಡ ತಾಣಗಳ ಇತಿಹಾಸ, ನಂಬಿಕೆಗಳು, ಐತಿಹ್ಯ, ಪರಿಸರ ಮುಂತಾದ ವಿವರಗಳನ್ನು ಚೆನ್ನಾಗಿ ಮೂಡಿಸಿದ್ದಾರೆ. ಚಾರಣ ಪ್ರದೇಶಗಳ ಪರಿಚಯ ಮತ್ತು ಭೌಗೋಳಿಕ ಸ್ಥಿತಿಗತಿಗಳ ಬಗ್ಗೆ ಸೂಕ್ಷ್ಮ ವಿವರಗಳು ಓದುಗರಿಗೆ ಲಭ್ಯ. ಎಪ್ಪತ್ತು ಪುಟಗಳಲ್ಲಿ ಜನಸಾಮಾನ್ಯರಿಗೆ ಉಪಯುಕ್ತ ಮಾಹಿತಿಗಳನ್ನು ಕಟ್ಟಿಕೊಟ್ಟಿರುವುದು ಮಹತ್ವದ ಸಮಾಜಮುಖಿ ಉಪಕ್ರಮವಾಗಿದೆ. ಈ ಪ್ರದೇಶದಲ್ಲಿ ಪ್ರವಾಸ ಹೊರಟವರಿಗೆ ಇದೊಂದು ಸ್ವಯಂ ಪೂರ್ಣ ಮಾರ್ಗದರ್ಶಿ ಕೈಪಿಡಿ. ಪ್ರವಾಸ ಕಥನದ ಲೇಖಕರಾದ ಶ್ರೀ ಕೆಂಪರಾಜು ಅವರು ನಿವೃತ್ತ ಪ್ರಾಂಶುಪಾವರು. ಈಗಾಗಲೇ ಬೇರೆ ಕೃತಿಗಳನ್ನು ರಚಿಸಿರುವ ಇವರಿಗೆ ಪ್ರವಾಸ ಕಥನ ರೂಢಿಸಿದೆ. ಅವರ ಈ ಕೃತಿ ಅವರಿಗೆ ಜನಪ್ರಿಯತೆ ಮತ್ತು ಯಶಸ್ಸನ್ನು ತರಲಿ ಎಂಬ ಹಾರೈಕೆಗಳು.