ಸುಶೀಲ ಎಸ್ ಅಮಿನ್ ಕೊಡವೂರು ಅವರ ಭಾವಗಳು ಕವಿತೆಗಳಾದಾಗ....

 ಸುಶೀಲ ಸತೀಶ್ ಅಮಿನ್, ಕೊಡವೂರು ಅವರ “ಭಾವಗಳು ಕವಿತೆಗಳಾದಾಗ”ಕವನಸಂಕಲನ ಭಾವನೆಗಳ ಒಳತಿರುಳಿಗೆ ಜನುಮ ನೀಡುತ್ತದೆ. ಶ್ರೀ ಸಾಯಿಬಾಬಾ, ರಾಮನಾಮದ ಭಕ್ತಿಯ ಸಿಂಚನ, ಆತನೊಬ್ಬ ಕರ್ಮಜೀವಿ ಕಾಲದೊಂದಿಗೆ ಕಥೆಯಾದವ ವಾಸ್ತವ ಜಗತ್ತಿಗೆ ಹಿಡಿದ ಕನ್ನಡಿ. ಪ್ರೀತಿ ವಿಶ್ವಾಸದ ನೂಲು ಹೇಗೆ ಹರಿದು ವೃದ್ದಾಶ್ರಮದ ಎತ್ತರದ ನಾಲ್ಕು ಗೋಡೆಗಳು ಬೆಳೆದವು, ನಡೆವ ದಾರಿಯಲಿ ಮಾನವೀಯತೆಯಿರಲಿ, ನುಡಿವ ನುಡಿಯಲಿ ಅಮೃತವಾಣಿಯಿರಲಿ ಎಂಬ ಭಾವನೆಗಳ ಕವನದ ಮೂಲಕ ಹೊರಹಾಕುವ ಕವಯತ್ರಿಯ ಮನದ ಭಾವನೆಗೆ ಶರಣು ಹಾಡಲೇಬೇಕು.ಕವನ ಜಳ್ಳಾಗಿರದೆ ಒಂದಲ್ಲ ಒಂದು ಸೂಚನೆಯನ್ನು, ಸಂದೇಶವನ್ನು ನೀಡಿದೆ. ಚೈತನ್ಯದ ಬೆಳಕು ಮೂಡಿಬರಲಿ ಎಂಬ ಆಶಾದಾಯಕ ಕವನ, ಅಮ್ಮನಗಲಿಕೆ ಮನಮುಟ್ಟುವ ಕವನ. ಕರ್ಮ ಭೂಮಿಗೆ ಚಿರಋಣಿ ಸಲ್ಲಿಸಿದ ಬಗ್ಗೆ ನಾಜೂಕಿನೊಂದಿಗೆ ತಿಳಿಸಿದ್ದಾರೆ. ನೋವ ಹಿಂದೆಯೂ ನಗುವಿನ ಮುಖವಾಡ ಧರಿಸುವ ಭವ್ಯ ನಟಿ ಅಕ್ಕನೆಂಬ ದೇವಿ ಕವನ ವಾತ್ಸಲ್ಯದ ತುಣುಕು.