ವಿಶಾರದೆಯ ಹನಿ.

ತೆರೆಯ  ಮರೆಯಲ್ಲಿ  ಅಡಗಿದ್ದ ಇವರ ಅರಳುವ  ಪ್ರತಿಭೆ,ಇತ್ತೀಚೆಗಿನ  ವರುಷಗಳಲ್ಲಿ  ಅರಳಿ  ಹೊರಬಂದು,ಸಾಹಿತ್ಯ   ಕ್ಷೇತ್ರದಲ್ಲಿ  ಕಂಪನ್ನು  ಚೆಲ್ಲುತ್ತಾ  ಇದೆ. ಈ   ಅನರ್ಘ್ಯ   ಕುಸುಮವೇ ಶ್ರೀಮತಿ  ಭಾರತಿ  ಕೊಲ್ಲರಮಜಲು. ಹೆಸರಾಂತ  ಸಾಹಿತಿಗಳಾಗಿದ್ದ  ದಿವಂಗತ  '"ವಿಚಿತ್ರ  ಯೇತಡ್ಕ'"ರವರ  ಮುದ್ದಿನ ಕಿರಿಯ ಪುತ್ರಿ. ಹಾಗಾಗಿ ಬರೆಯುವ ಕಲೆ  ರಕ್ತಗತವಾಗಿ  ಬಂದಿದ್ದು, ಎಳವೆಯಲ್ಲೇ ಇವರಲ್ಲಿ ಸಾಹಿತ್ಯದ ಮೇಲಿನ  ಅಭಿರುಚಿ ಅಂಕುರಿಸಿತ್ತು. ವೈವಿಧ್ಯಮಯ ಕವನಗಳು, ಭಾವ ಗೀತೆಗಳು, ಗಝಲ್ , ಮುಕ್ತಕಗಳು  .......ಇತ್ಯಾದಿ  ಸಾಹಿತ್ಯದ ಎಲ್ಲಾ ಪ್ರಕಾರಗಳಲ್ಲಿ, ಸುಂದರವಾದ  ಶೈಲಿಯಲ್ಲಿ   ಬರೆಯುವ ನೈಪುಣ್ಯತೆಯಿದೆ. ಈ ಉದಯೋನ್ಮುಖ ಕವಯಿತ್ರಿಯ  ಕವನಗಳು, ಸಾಮಾಜಿಕ ಜಾಲತಾಣದಲ್ಲಿ, ಸಾಹಿತ್ಯ ಬಳಗದ  ವಿವಿಧ  ಗುಂಪುಗಳಲ್ಲಿ  ಮತ್ತು  ಅನೇಕ  ಕವಿಗೋಷ್ಠಿಗಳಲ್ಲಿ ಜನಪ್ರಿಯತೆಯನ್ನು  ಗಳಿಸಿದೆ.  ಸಣ್ಣ ಕತೆಗಳಲ್ಲಿ  ಮತ್ತು ಲೇಖನಗಳಲ್ಲಿ,  ಇವರ ಮನದ ಭಾವ ಲಹರಿಗಳ   ಹರಿವಿನ  ಸೊಬಗು  ಹೊರಹೊಮ್ಮಿದೆ. ಅರಳು ಹುರಿದಂತೆ  ಮಾತನಾಡುವ ಭಾರತಿಯವರಿಗೆ  ನಿರರ್ಗಳವಾಗಿ ಭಾಷಣ  ಮಾಡುವ  ಮತ್ತು  ಸುಂದರವಾಗಿ  ನಿರೂಪಣೆ ಮಾಡುವ ಕಲೆ ಒಲಿದು ಬಂದಿದೆ. ಬದುಕಿನ ನಾನಾ ಸ್ತರಗಳ ಸುಖ,  ದುಃಖ, ನೋವು, ನಲಿವುಗಳು ಭಾವ  ತೋರಣವಾಗಿ ಕವನಗಳಲ್ಲಿ  ಕಂಗೊಳಿಸುತ್ತಿದೆ. ಬಿಡುವಿಲ್ಲದ ಮನೆಗೆಲಸಗಳಿದ್ದರೂ, ಸಂಗೀತ, ಭಜನೆ, ತೋಟಗಾರಿಕೆ ಇತ್ಯಾದಿ ವಿಷಯಗಳಲ್ಲಿ ತುಂಬ  ಆಸಕ್ತಿಯಿಂದ ಭಾಗವಹಿಸುತ್ತಾರೆ. ತಮ್ಮ ಕವಿ ಮನದ  ಸೊಬಗಿನಿಂದಾಗಿ,ಅನೇಕ  ಕವಿ--ಕವಯಿತ್ರಿಯರ  ಬಳಗದಲ್ಲಿ  ಬೆರೆತು, ಸಾಹಿತ್ಯ ಕೃಷಿಯ  ಬೆಳವಣಿಗೆಯು  ನಿರಂತರವಾಗಿ,  ಕನ್ನಡಾಂಬೆಯ  ಸೇವೆಯನ್ನು  ಮಾಡುತ್ತಿದೆ. ಮನೆ ಮಂದಿಯರ, ಒಡಹುಟ್ಟಿದವರ ಪ್ರೀತಿಯ ಸಂಪೂರ್ಣ  ಪ್ರೋತ್ಸಾಹದೊಂದಿಗೆ,  ಆಪ್ತ  ಬಂಧು ಮಿತ್ರರ, ಗೆಳತಿಯರ ಶುಭ  ಹಾರೈಕೆಗಳು ಕೂಡಾ,   ಇವರಿಗೆ ಯಶಸ್ಸಿನ ಮುಕುಟವನ್ನು  ಧರಿಸಲು ಸಹಕಾರಿಯಾಗಿದೆ ಅನೇಕ ಕೃತಿಗಳು  ಪ್ರಕಟಗೊಂಡು,  ಅತ್ಯುತ್ತಮ  ಪ್ರಶಸ್ತಿಗಳು ಕವಯಿತ್ರಿಯ  ಮುಡಿಗೇರಲಿ,  ಶ್ರೀ  ದೇವರು ಉತ್ತಮ  ಆಯುರಾರೋಗ್ಯಗಳನ್ನಿತ್ತು  ಹರಸಲಿ  ಮತ್ತು  'ಭಾರತಿ' ಎಂಬ  ತನ್ನ  ಹೆಸರಿನ ಸಾರ್ಥಕತೆಯನ್ನು  ಬೆಳಗುವುದರಲ್ಲಿ  ಕ್ರಿಯಾಶೀಲರಾಗಲೆಂಬ  ಶುಭ  ಹಾರೈಕೆಗಳು