ಮಾನವೀಯತೆಯ ದಿಕ್ಸೂಚಿ ‘ಬದುಕ ಬದಲಿಸುವ ಕತೆಗಳು’

ಸಮಕಾಲೀನ ಕನ್ನಡ ಸಾಹಿತ್ಯ ಲೋಕದಲ್ಲಿ ಕಥೆಗಳು ಕೇವಲ ಕಲ್ಪನೆಯ ರಂಜನೆಯಾಗದೆ, ಸಮಾಜದ ಕಣ್ಣು ತೆರೆಸುವ ತತ್ವಗಳಾಗಬೇಕೆಂಬ ಹಂಬಲ ಉಳ್ಳವರು ಡಾ. ಶಶಿಕಿರಣ್ ಶೆಟ್ಟಿ ಅವರು. ವೃತ್ತಿಯಿಂದ ವೈದ್ಯರಾಗಿರುವ ಇವರು ತಮ್ಮ ಸುತ್ತಮುತ್ತಲ ಜಗತ್ತನ್ನು ನೋಡುವ ದೃಷ್ಟಿಕೋನವೇ ಭಿನ್ನವಾಗಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ತಮ್ಮ ಕಥೆಗಳ ಕೃತಿ ಚೌರ್ಯವಾಗಿ ಬೇಸತ್ತಿದ್ದ ಲೇಖಕರಿಗೆ, ಅಲೆಮಾರಿ ಸಮುದಾಯದ ಬಾಲಕನೊಬ್ಬ ತನ್ನ ಕೃತಿಯನ್ನು ಓದಿ ಬದಲಾದ ಧನಾತ್ಮಕ ಘಟನೆ ಹೊಸ ಪ್ರೇರಣೆ ನೀಡಿತು. ಅದರ ಫಲವೇ ಈ 'ಬದುಕ ಬದಲಿಸುವ ಕತೆಗಳು - ಭಾಗ 4' ರ ಜನ್ಮ. ಈ ಕೃತಿಯು ಕೇವಲ ಅಕ್ಷರಗಳ ಜೋಡಣೆಯಲ್ಲ, ಬದಲಾಗಿ ನೊಂದ ಜೀವಗಳಿಗೆ ಹಚ್ಚುವ ಮುಲಾಮು ಎಂದರೆ ತಪ್ಪಾಗಲಾರದು. 

 

ಈ ಕಥಾಸಂಕಲನದಲ್ಲಿ ಬರುವ ಪ್ರತಿಯೊಂದು ಕಥೆಯ ಶೀರ್ಷಿಕೆಯೂ ಓದುಗರಲ್ಲಿ ಕುತೂಹಲ ಮೂಡಿಸುತ್ತದೆ. ಉದಾಹರಣೆಗೆ, ಮೊದಲ ಕಥೆಯಾದ "ಆ ಪ್ರಿನ್ಸಿಪಾಲ್ ಎಲ್ಲರಿಗೂ ಪೆನ್ ಹಂಚಿದ್ದು ಯಾಕೆ?" ಎಂಬ ಕಥೆ ಶ್ರೀಮಂತಿಕೆ ಮತ್ತು ಬಡತನದ ನಡುವಿನ ಕಂದಕವನ್ನು, ಹಂಚಿ ಉಣ್ಣುವ ಉದಾತ್ತ ಗುಣವನ್ನು ಚರ್ಚಿಸುತ್ತದೆ. ಕೇವಲ 8,000 ರೂಪಾಯಿ ಸಂಬಳ ಪಡೆಯುವ ವಾಚ್‌ಮ್ಯಾನ್ ಒಬ್ಬ ಕಾರ್ಮಿಕರ ದಿನದಂದು 200 ಕಾರ್ಮಿಕರಿಗೆ ತನ್ನ ಸ್ವಂತ ಖರ್ಚಿನಲ್ಲಿ ತಲಾ 10 ರೂಪಾಯಿಯ ಪೆನ್ ಉಡುಗೊರೆ ನೀಡಿ ಅವರ ಮುಖದಲ್ಲಿ ನಗು ತರಿಸುವ ಔದಾರ್ಯ ತೋರುತ್ತಾನೆ. ಇದನ್ನು ಕಂಡ ಲಕ್ಷಾಂತರ ರೂಪಾಯಿ ಸಂಬಳ ಪಡೆಯುವ ಪ್ರಿನ್ಸಿಪಾಲ್ ತನ್ನ ಕಂಜೂಸ್ ಮನಸ್ಥಿತಿಯನ್ನು ಬದಲಾಯಿಸಿಕೊಂಡು ಶಾಲಾ ಸಿಬ್ಬಂದಿಗಳ ಸಂಬಳ ಹೆಚ್ಚಿಸುವ ನಿರ್ಧಾರ ತಳೆಯುತ್ತಾನೆ. ಈ ಕಥೆ ನಮಗೆ "ಕೊಡಲು ದೊಡ್ಡ ಮನಸ್ಸು ಬೇಕೇ ಹೊರತು ದೊಡ್ಡ ಬ್ಯಾಂಕ್ ಬ್ಯಾಲೆನ್ಸ್ ಅಲ್ಲ" ಎಂಬ ಸತ್ಯವನ್ನು ಸಾರುತ್ತದೆ.ಅದೇ ರೀತಿ, "ಹೋಟೆಲ್ ಪಾರಿಜಾತ" ಕಥೆಯು ಕಳೆದುಹೋದ ಬಾಲ್ಯ, ತಂದೆ-ತಾಯಿಯ ನೆನಪುಗಳು ಮತ್ತು ಕೌಟುಂಬಿಕ ಮೌಲ್ಯಗಳ ಮಹತ್ವವನ್ನು ಮನಮಿಡಿಯುವಂತೆ ಚಿತ್ರಿಸುತ್ತದೆ. ಮಂಗಳೂರಿನ ರಾಷ್ಟ್ರೀಯ ಹೆದ್ದಾರಿಯ ಪಕ್ಕದಲ್ಲಿರುವ ಹೋಟೆಲ್‌ನಲ್ಲಿ ಪ್ರತಿದಿನ ಮರ್ಸಿಡಿಸ್ ಬೆಂಜ್ ಕಾರಿನಲ್ಲಿ ಬಂದು 7ನೇ ನಂಬರಿನ ಟೇಬಲ್‌ನಲ್ಲಿ ಇಡ್ಲಿ-ಸಾಂಬಾರ್ ತಿನ್ನುವ ವೃದ್ಧನೊಬ್ಬನ ಮರೆಯಾಗದ ಭೂತಕಾಲದ ನೆನಪುಗಳು ಓದುಗನ ಕಣ್ಣಾಲಿಗಳನ್ನು ಒದ್ದೆಯಾಗಿಸುತ್ತವೆ.  ಇನ್ನುಳಿದಂತೆ "ಬದುಕಿರುವಾಗಲೇ ಹೊಗಳಿಬಿಡಿ", "ಮಗನೇ ನೆನಪಿಡು ವೃದ್ಧಾಪ್ಯ ನಿನಗೂ ಇದೆ", "ಅನಾಥ ವೃದ್ಧಾಶ್ರಮಗಳಲ್ಲಿ ಕ್ಯಾಲೆಂಡರ್ ಇಡುವುದಿಲ್ಲ ಯಾಕೆ?" ನಂತಹ ಕಥೆಗಳು ಇಂದಿನ ಯಾಂತ್ರಿಕ ಜಗತ್ತಿನಲ್ಲಿ ಮರೆಯಾಗುತ್ತಿರುವ ಕೃತಜ್ಞತಾ ಭಾವ ಹಾಗೂ ಮಾನವೀಯ ಸಂಬಂಧಗಳ ಕಡೆಗೆ ಬಲವಾದ ಬೆಳಕು ಚೆಲ್ಲುತ್ತವೆ.

ಡಾ. ಶಶಿಕಿರಣ್ ಶೆಟ್ಟಿಯವರ ಬರವಣಿಗೆಯ ಶೈಲಿ ಅತ್ಯಂತ ಸರಳ ಹಾಗೂ ನೇರವಾಗಿದೆ. ಕ್ಲಿಷ್ಟಕರ ಪದಪ್ರಯೋಗಗಳಿಲ್ಲದೆ ಸಾಮಾನ್ಯ ಜನರಿಗೂ ಅರ್ಥವಾಗುವ ಭಾಷೆಯಲ್ಲಿ ಕಥೆಗಳನ್ನು ಹೆಣೆಯಲಾಗಿದೆ. ಕಥೆಗಳ ಕೊನೆಯಲ್ಲಿ ನೀಡುವ ಪುಟ್ಟ ಸಂದೇಶಗಳು ಓದುಗನ ಅಂತರಾಳವನ್ನು ಪ್ರಶ್ನಿಸುತ್ತವೆ. ಇಂದಿನ ಯುವ ಪೀಳಿಗೆ ಹಣದ ಬೆನ್ನತ್ತಿ ಹೆತ್ತವರನ್ನು ಕಡೆಗಣಿಸುತ್ತಿರುವ ಕಟು ಸತ್ಯವನ್ನು ಲೇಖಕರು ಇಲ್ಲಿ ತೀವ್ರವಾಗಿ ಖಂಡಿಸಿದ್ದಾರೆ. ಕರ್ಮಫಲ, ಅನ್ನದ ಋಣ, ಮಾನವೀಯತೆಯೇ ಶ್ರೇಷ್ಠ ಧರ್ಮ ಎಂಬ ನೈತಿಕ ಮೌಲ್ಯಗಳನ್ನು ಕಥೆಗಳ ಮೂಲಕ ಬೋಧಿಸದೆ, ಕಥಾ ಪ್ರವೇಶದ ಮೂಲಕವೇ ಓದುಗರು ಸ್ವಯಂ ಅರಿತುಕೊಳ್ಳುವಂತೆ ಮಾಡುವಲ್ಲಿ ಲೇಖಕರು ಯಶಸ್ವಿಯಾಗಿದ್ದಾರೆ.

ಈ ಕಥಾಸಂಕಲನದ ಪ್ರಮುಖ ಹೆಗ್ಗಳಿಕೆಯೆಂದರೆ, ಇಲ್ಲಿನ ಕಥೆಗಳು ಕೇವಲ ಮನರಂಜನೆಗೆ ಸೀಮಿತವಾಗದೆ ವ್ಯಕ್ತಿಯ ಆಲೋಚನಾ ಕ್ರಮವನ್ನು ಬದಲಾಯಿಸುವ ಶಕ್ತಿಯನ್ನು ಹೊಂದಿವೆ. ಲೇಖಕರೇ ತಮ್ಮ ಪ್ರಸ್ತಾವನೆಯಲ್ಲಿ ಹೇಳಿದಂತೆ, ಒಂದು ಪುಸ್ತಕವು ಒಬ್ಬ ವ್ಯಕ್ತಿಯ ಬದುಕನ್ನು ಸನ್ಮಾರ್ಗದತ್ತ ಮುನ್ನಡೆಸಲು ಪ್ರೇರಣೆಯಾದರೆ ಅದೇ ಲೇಖಕನಿಗೆ ಸಿಗುವ ಅತ್ಯುನ್ನತ ಪುರಸ್ಕಾರ. ಈ ನಿಟ್ಟಿನಲ್ಲಿ ಪುಸ್ತಕದ ಶೀರ್ಷಿಕೆಯಾದ 'ಬದುಕ ಬದಲಿಸುವ ಕತೆಗಳು' ಎಂಬುದು ಅನ್ವರ್ಥನಾಮವಾಗಿದೆ.