ಕವಿತ ಅವರ ಭಾವಲಹರಿ ಕವನ ಸಂಕಲನ

ನಾನು ನನಗೆ ಪರಿಚಯವಾಗುವ ಹೊಸ ಸ್ನೇಹಿತ ಸ್ನೇಹಿತೆಯರ ಬರಹಗಳನ್ನು ಹುಡುಕಿ ಇಷ್ಟಪಟ್ಟು ಓದುತ್ತೇನೆ ಹಾಗೂ ಅವರೊಂದಿಗೆ ನಿರಂತರವಾಗಿ ಓದಿದ್ದರ ಕುರಿತು ಮಾತನಾಡುತ್ತಾ ಇರುತ್ತೇನೆ. ಹಾಗೆ ಓದಿಸಿಕೊಳ್ಳುವ ಬರಹಗಾರರಲ್ಲಿ ಗೆಳತಿ ಕವಿತಾ ಕೂಡ ಒಬ್ಬರು. ಆರಂಭದಲ್ಲಿ ಇವರೊಂದಿಗೆ ಮಾತನಾಡುವಾಗ ಇವರು ಬೇರೆ ಊರಿನವರು ಇರಬೇಕು ಅಂದುಕೊ0ಡಿದ್ದೆ. ಆದರೆ ಇವರು ಕೂಡ ನನ್ನಂತೆಯೇ ಬರಹ ಪ್ರಿಯರು, ಮಣಿಪಾಲದವರು ಎಂದು ತಿಳಿದು ತುಂಬಾ ಖುಷಿಯಾಯಿತು. ಉತ್ತಮ ಪ್ರತಿಭೆಯಾದ ಕವಿತಇವರು ಹಲವಾರು ಬರಹಗಳನ್ನು ಹೆಗಲಿಗೇರಿಸಿಕೊಂಡ ಯುವ ಪ್ರತಿಭೆ ಎಂದರೆ ತಪ್ಪಾಗಲಾರದು. ಭಾವಲಹರಿ ಕವನ ಸಂಕಲನದ ಕವನಗಳು ಎಲ್ಲ ಆರಂಭಿಕ ಕವಿಗಳ ಕವನಗಳಂತೆಯೇ ಕಚ್ಚಾ ಆಗಿವೆ. ಮಾವಿನ ಮರದಲ್ಲಿ ಆಗಷ್ಟೇ ಹಳದಿ ಬಣ್ಣಕ್ಕೆ ತಿರುಗಿ ಪಾಡಿಗೆ ಬಿದ್ದು ಹಣ್ಣಾಗುತ್ತಿರುವ ಮಾವಿನಕಾಯಿ ತಿನ್ನಲು ಬಹಳ ರುಚಿಯಾಗಿರುತ್ತದೆ. ಅದರ ಹುಳಿಯೊಂದಿಗೆ ಬೆರೆತ ಸಿಹಿಯ ಸ್ವಾದ ಸವಿದವರಿಗೆ ಗೊತ್ತು. ಹಾಗೆಯೇ ಕವಿತೆಯಾಗಲು ಕಾಯುತ್ತಿರುವ ಕವಿತರವರ ಕವಿತೆಗಳು ಸಹ ಪಾಡಿಗೆ ಬಿದ್ದ ಮಾವಿನ ಹಣ್ಣಿನಂತೆಯೇ ರುಚಿಯಾಗಿ ಓದಿಸಿಕೊಳ್ಳುತ್ತಿವೆ. ಇವರ ಪ್ರಸ್ತುತ, ಅಮ್ಮ, ಅಪ್ಪ, ಗೆಳತಿ ಇತ್ಯಾದಿ ಕವನಗಳು ಸಂಬ0ಧಗಳ ಸುತ್ತಲೇ ಗಿರಕಿ ಹೊಡೆಯುತ್ತಿವೆಯಾದರೂ ಒಂದಕ್ಕೊ0ದು ಭಿನ್ನವಾಗಿವೆ.