ಕಲ್ಪನಾ ಅರುಣ ಅವರ ಸಾಗರದ ಅಲೆ

ನಿಂತ ನೀರಿಗೆ ಕಲ್ಲೆಸೆದಾಗ ಮೂಡುವ ರಿಂಗಣಗಳ ಹಾಗೆ ಕವನಗಳು ಕವಿ ಮನಸ್ಸಿನಲ್ಲಿ ಮೂಡುತ್ತವೆ. ಭಾವ ತೀವ್ರತೆ ಸಾಮಾನ್ಯವಾಗಿ ಕವನದ ಮೊದಲ ಮತ್ತು ಕೊನೆಯ ಚರಣಗಳಲ್ಲಿ ಹೆಚ್ಚಿರುತ್ತವೆ. ಮನಸ್ಸು ಭಾವಗಳಿಗೆ ಹೇಗೆ ಇಂಬು ಕೊಡುತ್ತದೆ ಎಂಬುದರ ಮೇಲೆ ಕವನದ ಅಭಿವ್ಯಕ್ತಿ ಅವಲಂಬಿಸಿರುತ್ತದೆ. "ಸಾಗರದಲೆ" ಸಂಕಲನದ ಕವಯತ್ರಿ ಮೂಲತಃ ಉತ್ತರ ಕನ್ನಡದವರಾಗಿದ್ದು ಈಗ ಶಿಕ್ಷಕಿಯಾಗಿ ಬೆಂಗಳೂರಿನಲ್ಲಿ ನೆಲೆಸಿದ್ದಾರೆ. ಪೂರ್ವಾಶ್ರಮದ ಮಲೆನಾಡ ಬದುಕು ಅವರನ್ನು ಪ್ರಭಾವಿಸಿರುವುದು ಕವನಗಳನ್ನು ಓದುತ್ತಾ ಹೋದಂತೆ ಗಮನಕ್ಕೆ ಬರದಿರುವುದಿಲ್ಲ. ಪ್ರಕೃತಿ, ನಿಸರ್ಗ, ಶ್ರಾವಣ, ಜಲಪಾತ, ಸಾಗರದಲೆ ಮುಂತಾದವು ಪ್ರಕೃತಿ ಪ್ರಭಾವಿಸಿದ ಕವನಗಳು. ಕನ್ನಡ ಮತ್ತು ಸಂಸ್ಕೃತಿಯ ಬಗ್ಗೆ ಅವರಿಗೆ ಇರುವ ಅಭಿಮಾನ ಮತ್ತು ಮನೋಧರ್ಮ ಕೂಡ ಕವನ ಪುಂಜದಲ್ಲಿ ವ್ಯಕ್ತವಾಗಿದೆ. ಕವನಗಳನ್ನು ಬರೆಯುವಾಗ ಪ್ರಾಸಕ್ಕಿಂತ ಭಾವ ತೀವ್ರತೆಗೆ ಹೆಚ್ಚು ಆದ್ಯತೆಯನ್ನು ಕೊಟ್ಟ ಹಾಗೆ ಅನಿಸುತ್ತದೆ. ತಮ್ಮ ಮನಸ್ಸಿಗೆ ಬಂದ ಪ್ರಾಂಜಲ ಭಾವಗಳನ್ನು ಸೊಗಸಾಗಿ ಕಟ್ಟಿಕೊಟ್ಟಿದ್ದಾರೆ.