ಡಾ. ಕೊಳ್ಚಪ್ಪೆ ಗೋವಿಂದ ಭಟ್ ಅವರ ‘ಋತುಗಾನ’

ನಾನು ಕಥೆಗಾರನೆಂದು ಗುರುತಿಸಿಕೊಂಡವನು. ಉದ್ಯೋಗದಿಂದ ನಿವೃತ್ತನಾಗಿ ಕಳೆದ ಸುಮಾರು ಐದು ವರ್ಷಗಳಿಂದ ಸಾಹಿತ್ಯವನ್ನು ಒಂದು ಹವ್ಯಾಸವಾಗಿ ಬೆಳೆಸಿದವನು. ನನ್ನ ಭಾವ ಕೋಶ ಬರೇ ಕಥೆಗಳನ್ನಷ್ಟೇ ಸೃಜಿಸುತ್ತದೆ ಎಂಬ ಅಸಮಾಧಾನ ಮನದ ಮೂಲೆಯಲ್ಲಿ ಮನೆ ಮಾಡಿತ್ತು. ಕರೋನ ಸಂದರ್ಭದಲ್ಲಿ ಅಂತರ್ಜಾಲ ಸ್ಪರ್ಧೆಗಳ ವೇದಿಕೆ ತೆರೆದುಕೊಂಡಾಗ ಕವನಗಳನ್ನು ಬರೆಯುವ ಅವಕಾಶ ಮೂಡಿ ಬಂತು. ಭಾವಗಳಿಗೆ ಅಕ್ಷರಗಳ ಅಲಂಕಾರವನ್ನು ಕೊಡುವ ಕಲೆ ಖುಷಿ ಕೊಡತೊಡಗಿತು. ಹಾಗೆ ಕರ್ಮವೀರ ವಾರಪತ್ರಿಕೆಯ ದೀಪಾವಳಿ ಕವನ ಸ್ಪರ್ಧೆಯಲ್ಲಿ ಒಂದು ಬಹುಮಾನವು ಬಂತು. ತುಷಾರ ಮಾಸಿಕದ ಚಿತ್ರಕವನ ಸ್ಪರ್ಧೆಯಲ್ಲಿ ಹಲವು ಬಾರಿ ಕವನ ಪ್ರಕಟಣೆಗೆ ಆಯ್ಕೆಯಾಯಿತು. ಆಗ ಅನಿಸಿದ್ದು ನಾನು ಕವನಗಳನ್ನು ಬರೆಯಬಲ್ಲೆ ಎಂದು. ಕತೆಗಾರನೆಂದು ಗುರುತಿಸಿದ ನನಗೆ ಕವಿ ಎನ್ನುವ ಸುಯೋಗ ಸಿಕ್ಕಿದ್ದು ಹಾಗೆ. ಬರೆದ ೨೦೦ ಕವನಗಳಲ್ಲಿ ಆಯ್ಕೆಗೆ ಸಿಕ್ಕಿದ್ದು ಸುಮಾರು ೫೦ ಕವನಗಳು. ಅವುಗಳನ್ನು ಒಟ್ಟು ಸೇರಿಸಿ "ಋತುಗಾನ" ಸಂಕಲನ ಬಣ್ಣ ಹಚ್ಚಿಕೊಂಡು ನಿಮ್ಮ ಮುಂದೆ ಬಂದಿದೆ.  ಈ ಕವನ ಸಂಕಲನಕ್ಕೆ ನಿಡುಗಾಲ ಸಹೋದ್ಯೋಗಿ ಮತ್ತು ಸ್ನೇಹಿತರಾದ ಖ್ಯಾತ ಸಾಹಿತಿ ಹೆಚ್. ಡುಂಡಿರಾಜ್‌ರಿಗೆ ಮುನ್ನುಡಿ ಬರೆಯಲು ವಿನಂತಿಸಿದಾಗ ಪ್ರೀತಿಯಿಂದ ಬರೆದು ಕೊಟ್ಟಿದ್ದಾರೆ ನನಗೆ ಹೊಳೆಯದ ಕೆಲವು ಕಾವ್ಯ ಗುಣಗಳನ್ನು ಕಂಡುಕೊAಡು ಬೆನ್ನು ತಟ್ಟಿ ಪ್ರೋತ್ಸಾಹಿಸಿದ್ದಾರೆ. ಇದರಿಂದಾಗಿ ಧೈರ್ಯವಾಗಿ ಕೃತಿಯನ್ನು ಅಳುಕಿಲ್ಲದೆ ನಿಮ್ಮ ಮುಂದಿಡಲು ಸಾಧ್ಯವಾಗಿದೆ. ಈ ಉತ್ತೇಜನಕ್ಕಾಗಿ ನಾನು ಶ್ರೀ ಡುಂಡಿರಾಜ್ ಅವರಿಗೆ ಆಭಾರಿ.  ನನಗೆ ಕವನಗಳು ಹೊಳೆಯುವುದು ನಿಸರ್ಗ ಮತ್ತು ಮನುಷ್ಯರ ಸಂಸರ್ಗದಲ್ಲಿ. ನಿವೃತ್ತಿಯ ಬಳಿಕ ಮನೆ ಮಂದಿಯೊAದಿಗೆ, ಇತರ ಸ್ನೇಹಿತರೊಂದಿಗೆ ಅಂತಹ ಬರವಣಿಗೆಗೆ ಸ್ಪೂರ್ತಿ ಕೊಡುವ ಸ್ಥಳಗಳಿಗೆ ಹೋಗಿ ಕಾವ್ಯವಸ್ತು ಮತ್ತು ಕಥಾವಸ್ತು ಸಂಗ್ರಹಿಸುವ ಹವ್ಯಾಸ ಬೆಳೆಸಿ ಕೊಂಡಿದ್ದೇನೆ. ನನ್ನ ಹವ್ಯಾಸಕ್ಕೆ ಸಾಥ್ ನೀಡುತ್ತಾ ಬಂದಿರುವವರಿಗೆಲ್ಲ ನನ್ನ ಕೃತಜ್ಞತೆಗಳು. ಮನೆ ಮಂದಿಯೆಲ್ಲ ನನ್ನನ್ನು ‘ಬರವಣಿಗೆ'ಗೆ ಬಿಟ್ಟಿದ್ದಾರೆ. ಅನುಕೂಲವಾದ ವಾತಾವರಣವನ್ನು ಒದಗಿಸುತ್ತಾ ಬಂದಿದ್ದಾರೆ. ಅವರ ಸಾತ್ತಿ÷್ವಕ ಸಹಯೋಗಕ್ಕೆ ಪ್ರೀತಿಯ ವಂದನೆಗಳು. 

ಸಾಹಿತ್ಯ ಪರಿಚಾರಕನಾಗಿ ಹೊಸ ಬರಹದಾರರ ಸಂಪರ್ಕದಲ್ಲಿದ್ದೇನೆ. ಅವರ ಜೊತೆಗೆ ಸಂವಾದ, ಚರ್ಚೆ, ತೀರ್ಪುಗಾರನಾಗಿ ಅವರಿಂದ ಸಿಗುವ ಕಲಿಕೆ ಕಾವ್ಯ ಸಂಪರ್ಕದಲ್ಲಿ ಇರಲು ಅನುವು ಮಾಡಿಕೊಟ್ಟಿದೆ. ಈ ಒಡನಾಟ ಕೆಲವೊಮ್ಮೆ ಕವನ ಬರೆಯುವ ಒತ್ತಾಯಕ್ಕೆ ಗುರಿ ಮಾಡುತ್ತಿದೆ. ಈ ಆಪ್ತ ವಲಯದ ಸಹವರ್ತಿಗಳಿಗೆ ಸ್ನೇಹಪೂರ್ಣ ಕೃತಜ್ಞತೆಗಳು. ಸದ್ಯದಲ್ಲಿ ನಿಮ್ಮ ಕೈ ಸೇರಲಿರುವ ಈ ಕವನ ಸಂಕಲನದ ಓದು ಮತ್ತು ಮೌಲ್ಯಮಾಪನಕ್ಕೆ ಸಹೃದಯರಾದ ಎಲ್ಲಾ ಓದುಗರಿಗೆ ಪೂರ್ವಭಾವಿ ಕೃತಜ್ಞತೆಗಳು.