ಉದಯೋನ್ಮುಖ ಯುವ ಕವಯತ್ರಿ ಶ್ರೀಮತಿ ವೇದಾವತಿಯವರ 'ಭಾವ ಬಿಂದು'

ಭಾವಗೀತೆಗಳು ಯಾವುದೇ ಭಾಷೆಯ ಸಾಹಿತ್ಯದಲ್ಲೂ ತನ್ನದೇ ಆದ ಪ್ರಾಮುಖ್ಯತೆಯನ್ನು ಹೊಂದಿರುತ್ತದೆ. ಅದಕ್ಕೆ ಕಾರಣಗಳು ಹಲವಿದ್ದರೂ  ಬಹು ಮುಖ್ಯವಾಗಿ ಅದು ಈ ಜಗತ್ತಿನ ಎಲ್ಲಾ ಜೀವಿಗಳ ಭಾವನೆಗಳಿಗೆ ಸಂಬಂಧಿಸಿದೆ ಎನ್ನಬಹುದು. ಈ ಜಗತ್ತಿನ ಪ್ರತಿ ಮನುಜನಲ್ಲೂ ತನ್ನದೇ ಆದ ಭಾವನೆಗಳಿರುವುದು ಸರ್ವೇಸಾಮಾನ್ಯ ಸಂಗತಿ. ಎಲ್ಲಾ ರಸಗಳನ್ನು ಒಂದೇ ಅಮೃತ ಪಾತ್ರೆಯಲ್ಲಿ ಕೂಡಿಟ್ಟು ಹಂಚಬಲ್ಲ ಸಾಹಿತ್ಯವೇ ಭಾವಗೀತೆಗಳು. ಉದಯೋನ್ಮುಖ ಯುವ ಕವಯತ್ರಿ  ಶ್ರೀಮತಿ ವೇದಾವತಿಯವರು ತಮ್ಮ ನವಿರಾದ ಭಾವಗಳನ್ನು 'ಭಾವ ಬಿಂದು' ಕವನ ಸಂಕಲನದ 30 ಕವನಗಳಲ್ಲಿ ಕಟ್ಟಿಕೊಟ್ಟಿದ್ದಾರೆ. ಕವನಗಳ ಸಂಖ್ಯೆ ಸೀಮಿತವಾದರೂ ಅವರ ಆಯ್ಕೆಯ ವಿಷಯಗಳು ವೈವಿಧ್ಯಮಯವಾಗಿವೆ.  ಕವನಗಳಲ್ಲಿ ಕೆಲವು ಸಾಧಕರ ಕುರಿತಾದ ವ್ಯಕ್ತಿ ಚಿತ್ರಗಳು ಸೇರಿವೆ. ಹಂಪಿ, ಮಕ್ಕಳ ದಿನಾಚರಣೆ,  ಮತದಾನದಂತಹ ಸರಳ ವಿಷಯಗಳ ಕುರಿತ ಕವನಗಳು ರಾರಾಜಿಸುತ್ತವೆ.  ಪ್ರೇಮ ಕಾವ್ಯ, ಮುತ್ತಿನ ಮಳೆ, ಒಲವಧಾರೆ ನವಿರಾದ ಭಾವಗಳಿಗೆ ಬಣ್ಣ ಹಚ್ಚಿದ ಭಾವಪೂರ್ಣ ವರ್ಣ ಚಿತ್ರಗಳು. 'ಮನಮೋಹಕ' ಎಂಬ ಶೀರ್ಷಿಕೆಯ ಕವನದ ಈ ಸಾಲುಗಳ ಭಾವ ತೀವ್ರತೆಯನ್ನು ಗಮನಿಸಿ

ಮರೆತರೂ ಬಿಡದೆ ಕಾಡುವೆ ಅನುಕ್ಷಣವೂ ನೀ ಇಲ್ಲಿ ಮನಸ್ಸಿನ ಭಾವಗಳ ಸುಪ್ತ ಹರಿವು ಚೆನ್ನಾಗಿ ಮೂಡಿಬಂದಿದೆ. ಕನ್ನಡ ನಾಡನ್ನು ವಿಜೃಂಭಿಸಲು ಅವರ ಕವನ ಇಂತಿದೆ.