'ಕಥಾಗುಚ್ಛ' — ಬದುಕಿನ ವಿವಿಧ ಆಯಾಮಗಳನ್ನು ಅನಾವರಣಗೊಳಿಸುವ ಕಥೆಗಳ ಹಂದರ

ಲೇಖಕಿ: ಪಂಕಜಾ ಕೆ. ರಾಮಭಟ್   

ಪ್ರಕಾಶನ: ಕಥಾಬಿಂದು ಪ್ರಕಾಶನ, ಮಂಗಳೂರು   

ಪ್ರಥಮ ಮುದ್ರಣ: ಜನವರಿ 2024   

ಪುಟಗಳು: 188

ಪ್ರಸ್ತುತ ಸಂಕಲನದಲ್ಲಿ ಒಟ್ಟು ಅರುವತ್ತು (60) ಕಥೆಗಳಿವೆ. ಇಂದಿನ ವೇಗದ ಯುಗದಲ್ಲಿ, ಕೆಲಸದ ಒತ್ತಡದ ನಡುವೆ ಯಾಂತ್ರಿಕವಾಗುತ್ತಿರುವ ಗಂಡ-ಹೆಂಡತಿಯರ ದಾಂಪತ್ಯ ಜೀವನ, ಹದಿಹರಯದ ಆಕರ್ಷಣೆಗೆ ಒಳಗಾಗಿ ಹೆತ್ತವರನ್ನು ಮರೆತು ಮೋಸದ ಜಾಲಕ್ಕೆ ಬೀಳುವ ಹೆಣ್ಣುಮಕ್ಕಳ ವ್ಯಥೆ, ಪ್ರೀತಿ, ಪ್ರೇಮ, ವಿರಹ ಹಾಗೂ ವೃದ್ಧಾಪ್ಯದಲ್ಲಿ ಹೆತ್ತವರನ್ನು ಕಡೆಗಣಿಸುವ ಮಕ್ಕಳ ಧೋರಣೆಗಳೇ ಇಲ್ಲಿನ ಪ್ರಮುಖ ಕಥಾವಸ್ತುಗಳಾಗಿವೆ. ಪ್ರತಿ ಕಥೆಯೂ ಓದುಗರಿಗೆ ಒಂದು ಅರಿವಿನ ಸಂದೇಶ ಅಥವಾ ನೀತಿಯನ್ನು ತಲುಪಿಸುವಲ್ಲಿ ಯಶಸ್ವಿಯಾಗಿದೆ.  ಸಂಕಲನದ ಆರಂಭಿಕ ಕಥೆಯಾದ 'ಬೋಳು ಮರ ಚಿಗುರಿತು' ಕಥೆಯು ಬಡತನ ಮತ್ತು ಕೌಟುಂಬಿಕ ಒತ್ತಡದಿಂದಾಗಿ ತನಗಿಂತ 20 ವರ್ಷ ದೊಡ್ಡವನಾದ ಅನಾರೋಗ್ಯ ಪೀಡಿತ ವ್ಯಕ್ತಿಯನ್ನು ಮದುವೆಯಾಗಬೇಕಾಗಿ ಬರುವ ಶರಧಿ ಎಂಬ ಮಹತ್ವಾಕಾಂಕ್ಷೆಯ ಹುಡುಗಿಯ ಕಥೆಯಾಗಿದೆ. ಗಂಡ ನರಹರಿರಾಯರ ಉದಾತ್ತ ಗುಣದಿಂದಾಗಿ ವಿದ್ಯಾಭ್ಯಾಸ ಮುಂದುವರಿಸಿ ಶಿಕ್ಷಣಾಧಿಕಾರಿಯಾಗುವ ಆಕೆಯ ಬದುಕು, ಗಂಡನ ಮರಣದ ನಂತರ ಪ್ರಸಾದನ ಸಾಮೀಪ್ಯದಿಂದ ಹೇಗೆ ಮರಳಿ ಚಿಗುರುತ್ತದೆ ಎಂಬುದನ್ನು ಲೇಖಕಿ ಸುಂದರವಾಗಿ ಚಿತ್ರಿಸಿದ್ದಾರೆ.  ಮತ್ತೊಂದು ಕಥೆ 'ದಡ ಸೇರಿದ ದೋಣಿ' ಸಮಾಜದಲ್ಲಿ ಇಂದಿಗೂ ಕಡೆಗಣಿಸಲ್ಪಡುವ ತೃತೀಯಲಿಂಗಿಗಳ (ದ್ವಿಲಿಂಗಿ) ಸೂಕ್ಷ್ಮ ಸಂವೇದನೆಯನ್ನು ಚರ್ಚಿಸುತ್ತದೆ. ಹೆತ್ತವರ ಪ್ರೀತಿ, ಧೈರ್ಯ ಮತ್ತು ಸಮಾಜದ ಮುಖಕ್ಕೆ ಹೆದರದೆ ಮಗನನ್ನು ಮಗಳನ್ನಾಗಿ ಸ್ವೀಕರಿಸಿ, ಆಕೆಯನ್ನು ಸಮಾಜ ಹೆಮ್ಮೆಪಡುವಂತಹ ವೈದ್ಯೆಯನ್ನಾಗಿ ರೂಪಿಸುವ ಪೋಷಕರ ಮೇರು ವ್ಯಕ್ತಿತ್ವ ಇಲ್ಲಿ ಅನಾವರಣಗೊಂಡಿದೆ.  'ಸ್ವರ್ಗ ಸದೃಶ ಜೀವನ' ಕಥೆಯು ಇಂದಿನ ಆಧುನಿಕ ಕಾಂಕ್ರೀಟ್ ಕಾಡಿನ (ಬೆಂಗಳೂರು) ಯಾಂತ್ರಿಕ ಬದುಕಿಗಿಂತ ಹಳ್ಳಿಯ ಪ್ರಶಾಂತ ವಾತಾವರಣ, ಜಂಟಿ ಕುಟುಂಬದ ಪ್ರೀತಿ ಮತ್ತು ಪ್ರಕೃತಿಯ ಮಡಿಲು ಎಷ್ಟು ಶ್ರೇಷ್ಠವಾದುದು ಎಂಬುದನ್ನು ಸುಶಾಂತ್ ಮತ್ತು ಸುಮಾಲಿ ದಂಪತಿಗಳ ಕೊರೊನಾ ಕಾಲದ ಅನುಭವದ ಮೂಲಕ ಮನವರಿಕೆ ಮಾಡಿಕೊಡುತ್ತದೆ. ಇನ್ನುಳಿದಂತೆ 'ಯೌವನದ ಹೊಳೆಯಲ್ಲಿ' ಹದಿಹರಯದವರಿಗೆ ಕಿವಿಮಾತು ಹೇಳಿದರೆ, 'ತಾಳ್ಮೆಯಿರಲಿ' ಕಥೆಯು ದಾಂಪತ್ಯದ ಸಾಮರಸ್ಯವನ್ನು ಮತ್ತು 'ಬಾಳ ಬೆಳಕು' ಕಥೆಯು ಮಲತಾಯಿಯ ಕಾಟದಿಂದ ಮುಕ್ತಿ ಪಡೆಯುವ ಹಾದಿಯನ್ನು ತೋರಿಸುತ್ತದೆ.